想叫大家小心一間叫”Notebook Technology Co.”既電腦舖，地址係：灣仔電腦城235號舖，但270號舖都係同一個老細。



我朋友(真係我朋友，唔係我，我冇咁笨)，佢攞咗部手提電腦去呢間舖檢查，因為開機之後部機boot唔起，先聲明，佢買咗部機之後未攞過去任何地方整，呢次係第一次，我都叫咗佢唔好去呢個場整，因為聽過呢度有好多黑店，但佢話上網check過無人講呢間，所以就去咗，開頭話三日內檢查同整埋，但整之前會報價，點知攪咗成三個星期，追咗好多次都未check，攪到我個朋友打去同佢講要攞番部機唔check啦，咁佢第二日去攞機時，個人話部機係底板壞咗，整二千六，咁我朋友其實已經決定咗去原廠整，因為唔係差好遠，但跟住發現個Power制爛咗，咁我朋友同佢嘈啦，開頭佢都依依呵呵，後來又話攞嚟已經係咁，我朋友唔理佢，話我唔理你，總唔知我明天嚟囉，你同我整番佢。



咁佢第二日去攞番部機，個制已經整好咗，佢就攞咗部機去NEC維修部整，順便同佢講叫佢check吓部機，因為人哋keep咗部機咁耐，佢都開始驚驚哋比人換咗嘢，原廠check完之後話比佢知部機超過七成既鏍絲都唔屬於呢部機或者係上錯位，不過呢啲都係小問題，因為佢可以攪番掂，但就比人換咗個DVD ROM，原廠呢個型號手提電腦係用Toshiba DVD Combo，可讀DVD及CD，但只可寫CD，但就比人換一個外殼係Toshiba DVD Rewritable ROM，但內裡既零件係佢都唔識既牌子，仲係壞既，咁我朋友揾我陪佢番去理論，我都驚驚哋，因為聽到都話果度好似有黑社會；果晚去到同店舖既負責人劉小姐理論，認住佢呀，佢講廣東話唔正既，當時佢好鬼惡，發晒爛炸，最後我哋攪到報埋警。但到而家都係攞住個假嘢，企咗响度。如果而家要換番自己嗰個要成$1100，真慘.........



後來由於有朋友話佢個親烕响呢個商場做，咁睇吓佢哋識唔識幫唔幫到手，但可惜佢唔識呢間舖，佢仲話呢個商場好多間都會做啲咁既嘢既，因為通常都無諗過你會攞去check，咁當然唔係部部換啦。



總知一句，大家小心，唔好幫襯呢啲奸商啦！！

我都有相同的遭遇.
事關我的IBM Notebook BOIS 密碼lock 住咗.我拿去整. 報價$250.本人覺得價錢合理,所以就擺低咗.
到夜晚,我收到電話,話報錯價, 要$500, 本人拒絕, 話最多只俾$300, 然後個SALES 話同公司傾啊.
到了第二日,又收到電話, 又話報錯價, 要$980 ...
要係白痴.......