敏妮 Talk：買日本 ETF賺一成

[size=5]魏力報喜，日本地震之後，魏力身體力行入市撐災區，將自己四成強積金轉咗去日股基金。雖然有從事日本期貨廿幾年嘅前輩提議，叫佢博中國起飛，好過等火鳳凰重生，但佢就早過股神畢菲特話要趁地震買日股。
魏力同敏妮講，單係上個禮拜二佢轉 portfolio嗰日計，到今個星期三收市，呢個投資決定為佢帶嚟超過 8%回報。
雖然呢兩日日股下跌，但長線計，佢仲係睇好。數吓手指， 7個交易日升逾 8%，喺家陣呢啲市況，真係令敏妮羨慕到不得了。


升得多會跌　跌得多會升
敏妮個 portfolio以亞太區股市基金為主，回報自金融海嘯後逐步收復失地，基金有日股成份，雖然敏妮冇喺地震後轉軚，但同魏力相比，無論膽識定反應都唔及佢。
不過，魏力話，佢個朋友仲值得羨慕，因為係佢朋友講起，大家先為意，原來香港有隻日本 ETF──領先日本 ETF（ 2814）。
日本災後首兩個交易日，領先日本 ETF每日跌超過半成。魏力朋友 15號當日入市撈貨，今個禮拜二獲利沽出。敏妮唔知呢位朋友係乜嘢價位買入，又喺乜嘢價位沽出，如果以買入當日收市價 7.57蚊，同沽出當日收市價 8.33蚊計，賺幅 10%。
呢位朋友嘅賺錢經過，令敏妮諗起邱古奇講嘅一個笑話。邱前輩話，啲人成日問佢點解隻股會跌，或者點解隻股會升，佢有兩套答案回應，「隻股多人買咪升囉，多人沽咪跌囉！」又或者係，「隻股升得多咪跌囉，跌得多咪升囉！」
日本核危機仍然未解決，重建經濟需時，日股短期反彈的表現，可能真係好似邱前輩所講，跌得多咪彈囉！

溫敏妮[/size]